R E G I O N Ų    K U L T Ū R I N I Ų    I N I C I A T Y V Ų     C E N T R A S English      
Adresas: Vilniaus g. 22, LT-01119 Vilnius.
Tel./faksas (8~5) 261 9670, mob. tel. 8 687 47550. El. paštas
zemaiciu@gmail.com
          
 
Į pradžią Laiškams Laiškai                 Atsakymai į klausimus                      Paieška                 

Tradicijos ir papročiai

Kuršė nešėms   Išbinkiavėms

KURŠĖ NEŠĖMS

1920 metaas lėnus mynė Kuliu valsčiaus Luknienu suoduo pas 17 gektaru ūkininką Rupši Ėgnaca. Talkuo bovau ir aš, turaet dar Salytė Marta. Dėrba 9 braukiejee. Lėnamėnė bova vėino arklio šokama. Arkli varė pėimėnoks, katros bova atsisiedės pri pat arkle oudėguos. Lėnamėnė šoka jaujuo. Dontyts rats aukštaa šoka šeštame, vo ta – lėnamėnė. Talka dėrba vėsa nakti. Pryš aušra kaimą vaikee padėrba kurši — šiaudėnė vyra čiučela. Apvelka anaa stuoras kelnės, palita, sujousė pakulinio pončio, kuojės apmuovė aulėnees medpadees, unt galvuos uždiejė medėnė kaukė: kumpa nuosės, akys, lūpas, ausys, onglim nuteptas, oustaa, barzda, sakaas prilipdyta, plaukaa lėnėnee, ont pakaušė — jouduos medžeguos skrybelie. Kurši ymetė per mažuosės dorelės pri peludės unt mona kopras. Iš karta jaujuo pasėgėrda jouks: „Va, Maitas kavalierios!“
Jaujuo bovė vyraa tujau pradiejė kuršė nešiejus gintėis. Keik ginies, keik neginies, bet nesugava ir nesužėnuojė, kas iš anū kurši ymetė. Tumet kurši pametė jaujuo. Už keliu dėinū kurši myniejee sodraskė.
Lėnus toukart pas ūkininkus tris paras mynė. Vu tas kuršis bova tuoks špuosos, pasijoukėms iš talkininku. Vaikee tonkee lėnus mindamė liuob sakytė: „Eisem kuisi nešte“.

Papasakuojė JANUŠIENĖ MARTA iš Kuliu valsčiaus
Repšātiu kaima 1970 metu kuova 13 dėina

IŠBINKIAVĖMS

Lėnus mynė naktym. Daug vėsuokiausiu špuosu per tas talkas liuob pridarytė. Išbinkiavėms liuob būtė dėdliausis žmuogaus pažemėnėms. Kaap tou darė? Pagriebs berną ar mergė kėlė vyraa (vėinė už kuojų, kėtė per petius ir užpakali) ir padaužys i lėnu menama binki, katrame bova lėnu mynieju mintovaa. Tas liuob teestėis kuokės pėnkės mėnotės. Binkioujemasis liuob miegintė ištrūktė iš mynieju ronku, šaukė, steniejė, vu binkioutuojee dėrba sava darbą ir sotartėnaa šaukė „uraa!“. Kėtė talkininkaa veiziejuos, joukies ir šaukė, ka daa daugiau binkioutom.
 

Papasakuojė DIRMEIKIS ANTANS iš Plateliū apylinkės
1971 metu gegožės 16 dėina
 

 

[Į pradžią] [Laiškai] [Atsakymai į klausimus] [Paieška] [Kalendorius] [Naujienos]  [Naudingos nuorodos]

© Regioninių kultūros iniciatyvų centras

Svetainės priežiūra: Multimedijos centras humanitarams Matematikos ir informatikos institute

Tinklalapis atnaujintas 2007.06.24